სასამართლომ ყადაღა დაადო ძვირადღირებულ უძრავ ქონებებს მეუღლეთა საერთო ქონების გაყოფის დავაში

სასამართლომ ყადაღა დაადო ძვირადღირებულ უძრავ ქონებებს მეუღლეთა საერთო ქონების გაყოფის დავაში

საადვოკატო ბიურო „ფხალაძე და პარტნიორები“ | ოქტომბერი, 2026

თბილისის საქალაქო სასამართლომ სრულად დააკმაყოფილა ჩვენი ბიუროს შუამდგომლობა სარჩელის უზრუნველყოფის შესახებ და ყადაღა დაადო ოთხ ძვირადღირებულ უძრავ ქონებას, რომლებიც ყოფილი მეუღლის სახელზეა რეგისტრირებული. შედეგად, დავის დასრულებამდე ამ ქონების გასხვისება ან დატვირთვა შეუძლებელია, ხოლო ჩვენი კლიენტის ინტერესები რეალურად დაცულია.

საქმის არსი

ჩვენი კლიენტი თითქმის ცხრა წელი იმყოფებოდა რეგისტრირებულ ქორწინებაში. ამ პერიოდში, ძირითადად მისი სახსრებით (800 000 ლარზე მეტი საბანკო გადარიცხვით), შეძენილ იქნა თბილისის ცენტრალურ უბნებში მდებარე ბინა და კომერციული ფართები. ყველა ქონება რეგისტრირდა მეუღლის სახელზე. ქორწინების განმავლობაში მეუღლის დედამ ოჯახს აჩუქა კიდევ ერთი ბინა.

განქორწინების შემდეგ, როცა კლიენტი საქართველოს ფარგლებს გარეთ იმყოფებოდა, ყოფილმა მეუღლემ მისი თანხმობისა და ინფორმირების გარეშე ერთი ქონება გაასხვისა, ორი კი ბანკის სასარგებლოდ იპოთეკით დატვირთა. ქონების შემდგომი განკარგვის რეალური საფრთხე არსებობდა.

რას ვითხოვეთ სასამართლოში

• ქორწინებისას შეძენილ სამ ქონებაზე და ჩუქებით მიღებულ ბინაზე მეუღლეთა თანასაკუთრების აღიარება და კლიენტის 1/2 წილის მესაკუთრედ ცნობა;

• უკვე გასხვისებული ქონებიდან მიღებული თანხის 1/2-ის ანაზღაურება (კეთილსინდისიერ შემძენს არ ვედავებით);

• სარჩელის უზრუნველყოფა – ყადაღა ოთხივე სადავო ქონებაზე.

სამართლებრივი საფუძვლები

• საქართველოს სამოქალაქო კოდექსის 1158-ე და 1160-ე მუხლები – მეუღლეთა საერთო ქონება და მისი განკარგვა;

• სამოქალაქო კოდექსის 1161-ე მუხლი – ჩუქებით მიღებული ქონების რეჟიმი;

• საქართველოს სამოქალაქო საპროცესო კოდექსის 191-ე და 198-ე მუხლები – სარჩელის უზრუნველყოფა;

• საქართველოს უზენაესი სასამართლოს გადაწყვეტილება №ას-963-2018 (25.04.2019).

რატომ არის მნიშვნელოვანი ნაჩუქარი ბინის საკითხი

ზოგადი წესით, ქორწინებისას ნაჩუქარი ქონება მეუღლის ინდივიდუალური საკუთრებაა. თუმცა უზენაესი სასამართლოს პრაქტიკით ეს წესი ავტომატურად არ მოქმედებს: გადამწყვეტია მჩუქებლის ნება. თუ ქონება მთლიანი ოჯახის, მეუღლეებისა და შვილების კეთილდღეობისთვის იყო განკუთვნილი, იგი მეუღლეთა თანასაკუთრებად მიიჩნევა. ამ საკითხის ანალიზი მოცემულია ადვოკატ ნიკოლოზ ფხალაძის სტატიაში „მეუღლეთა თანასაკუთრება“ („სამართალი და მსოფლიო“, №14, 2020).

რჩევა მკითხველს

თუ ყოფილი მეუღლე საერთო ქონებას თქვენი თანხმობის გარეშე ყიდის ან ტვირთავს, ნუ დაელოდებით. რაც უფრო ადრე მიმართავთ სასამართლოს სარჩელისა და უზრუნველყოფის შუამდგომლობით, მით მეტი ქონების დაცვაა შესაძლებელი. ერთხელ კეთილსინდისიერ შემძენზე გადასული ქონების დაბრუნება თითქმის შეუძლებელია, დარჩენილის შენარჩუნება კი დროულ ყადაღაზეა დამოკიდებული.

საადვოკატო ბიურო „ფხალაძე და პარტნიორები“
ქ. თბილისი, ალ. ყაზბეგის გამზ. №24გ, AXIS Complex, მე-10 სართული
+995 597 117 795 | www.pkhaladze-law.ge